حزبی رزگاریی کوردستان، سی وحەوتەمین ساڵیادی یەکێتیی نیشتمانیی کوردستان پیرۆز دەکات

بەبۆنەی سی و حەوتەمین ساڵیادی دامەزراندنی یەکێتیی نیشتمانی کوردستان، هەڤاڵ رێکار ئەحمەد سکرتێری گشتی حزب لە پەیامێکدا پیرۆزبایی لە بەڕێز مام جەلال سکرتێری گشتی یەکێتیی نیشتمانیی کوردستان کرد و هیوای لەشساغی و تەمەندرێژی و سەرکەوتنی بۆخواستن، هەر بەوبۆنەیەوە مەکتەبی سیاسی حزبمان پەیامێکی پیرۆزبایی بۆ مەکتەبی سیاسی یەکێتیی نیشتمانیی کوردستان رەوانە کرد

لە بەشێکی پەیامەکی هەڤاڵ سکرتێری گشتی حزب بۆ رێزدار سەرۆک مام جەلال دا هاتووە:

بەڕێز مام جەلال، سکرتێری گشتی یەکێتیی نیشتمانیی کوردستان

سڵاوی رزگاری و سەرخۆبوون..

لەپێوەند بە سی و حەوتەمین ساڵیادی دامەزراندنی یەکێتییە تێکۆشەرەکەتان، خۆم بەبەختەوەر دەزانم بەناوی خۆم و هەڤاڵانم لە مەکتەبی سیاسی حزبی رزگاریی کوردستان پیرۆزباییتان لێدەکەم، لەڕێی بەێزیشتانەوە سڵاوو پیرۆزبایی لە بەڕێزان ئەندامانی ئەنجوومەنی سەرکردایەتی و سەرجەم کادرو ئەندامانی یەکێتیی نیشتمانیی کوردستان دەکەم، دەخوازم وەک هەمیشە شادو سەرفرازو سەرکەوتوو بن.

سەرۆکی بەڕێز! لای هەمووان ئاشکرایە کە یەکێتیی نیشتمانیی کوردستان هەر لە سەرەتای دامەزراندنیەوە تا ئەمڕۆ رۆڵی پێشەنگایەتی لە بزاڤی رزگاریخوازی گەلی کوردستاندا کایە کردوە، بە تێکۆشان و قوربانیدانە زۆروزەوەندەکانی، سەروەری مێژوویی بۆ خۆی و گەلەکەی تۆمار کردوە...

هەروەها لە بەشێکی پەیامەکەی مەکتەبی سیاسی حزب دا هاتووە:

بەڕێز مەکتەبی سیاسی یەکێتیی نیشتمانی کوردستان

سڵاوی رزگاری و سەرخۆبوون..

لەپێوەند بە سی و حەوتەمین ساڵیادی دامەزراندنی یەکێتییە تێکۆشەرەکەتان، خۆمان بەبەختەوەر دەزانین کە بەناوی خۆمان و سەرجەم ئەندامانی حزبی رزگاریی کوردستان پیرۆزباییتان لێدەکەین، دەخوازین وەک هەمیشە شادو سەرفرازو سەرکەوتوو بن.

بەڕێزان! لای هەمووان ئاشکرایە کە یەکێتیی نیشتمانیی کوردستان هەر لە سەرەتای دامەزراندنیەوە تا ئەمڕۆ رۆڵی پێشەنگایەتی لە بزاڤی رزگاریخوازی گەلی کوردستاندا کایە کردوە، بە تێکۆشان و قوربانیدانە زۆروزەوەندەکانی، سەروەری مێژوویی بۆ خۆی و گەلەکەی تۆمار کردوە، جێی شانازیشە کە ئێستا سکرتێرە بەڕێزەکەی سەرکۆماری وڵاتەو خۆنەویستانە لەپێناو مسۆگەرکردنی ماف و ئازادی و یەکێتیی ریزەکاندا تێدەکۆشێ، بۆ دەربازکردنی وڵات لەو قەیرانەی تێیکەوتووە رێبەرایەتی دەکات..

بێگومان راستیێکی حاشا هەڵنەگرە کە مێژووی تێکۆشانی یەکێتیی، کێوی سەربەرزی نیشتمان بە خوێنی سووری شەهیدان و ماندووبوونی تێکۆشەرەکانیەوە نەخشێندراون، دەستکەوتەکانی ئێستایش بەرهەمی ئەوانن، بۆیە جێی خۆیەتی لە سی و حەوتەمین ساڵیادی یەکێتیی نیشتمانیی کوردستاندا بەر لە هەموو شتێک سڵاوی ئەمەک و وەفاداری بۆ گیانی پاکی شەهیدە سەربەرزەکانی رێی رزگاری و سەربەخۆیی کوردستان بنێرین.

ئێمە لە حزبی رزگاریدا هیواخوازین کە هەموو ساڵێک بە شكۆوە ساڵیادی دامەزراندنی یەکێتیی نیشمانیی کوردستان پیرۆز بکرێ، مێژووی پڕشانازیشی گەز گەز باڵا بکات.

لە دویماهیدا سڵاوو پیرۆزبایی خۆمان دووپات دەکەینەوە، هیوای شادی و لەشساغی و سەرفرازتان بۆ بە ئاوات دەخوازین