تووڕەیی
خەڵک سوپای تورکیا بەچۆک دادێنێ
خەڵکی ئازادیخوازی کوردستان!
سەربەخۆخواز و رزگاریخوازن!
چەندین ساڵە
دەوڵەتی تورک بەبەرچاوی هەموو
جیهان و لەبێدەنگی حکومەتی
هەرێمی کوردستاندا هێرش دەکاتە سەر
خاکی باشووری کوردستان و خەڵکی سڤیل و
لاشەڕ شەهید و بریندار دەکات.
رۆژانە فرۆکە جەنگییەکانی
تورک و تۆپخانە دوورهاوێژەکانی بێبەزەییانە
باشووری کوردستان دەکوتن، بۆ
کۆتاییهێنان بەو سەرکێشی و
تاوانکاریەدا، دەیانجار جەماوەری
کوردستان داوایان کردووەو گازاندەی خۆیان بە
حکومەت و پەرلەمان گەیاندووەو
خواستوویانە کە بنکەو بارەگای سوپای
داگیرکار لەنێو خاکی هەرێمدا
نەمێنێ و سەربازانی بێگانە بۆ
ماڵی خۆیان بگەڕێنەوە،
بەڵام گوێ لە خواست و داوای گەل
نەگیراوە، بەرپرسانی حکومەت
بێباکانە بازاڕیان لەگەڵ
داگیرکاراندا گەرم کردووە، ئەمەش
وایکردووە کە داگیرکاران دەست نەپارێزن
و هەرکاتێ بیانەوێ هێرش و پەلامار
بهێنن و خەڵکی سڤیل و لاشەڕ بکەنە
ئامانج.
بەدرێژایی
ساڵانی رابردوو، سەدان جار گوندو
ئاواییەکانی باشوور کراونەتە ئامانج و
بۆردومان و بۆمباران کراون، کەچی هەرێم و
بەغداد چاویان لەئاست ئەو پێشێلکاریانە
نوقاندووە، سەروماڵ و گیانی
خەڵکیان نەپاراستووە، بەوهۆیەوە
چارەنووسی گەلی باشووری کوردستان بە دوژمن
سپێردراوە. تەنانەت لە دوو رۆژی
رابردوودا بەهۆی بۆردومانی فڕۆکە
جەنگییەکانی تورکیاوە شەش
خۆوڵاتی دەڤەری شێلادزێ
گیانیان لەدەستداوە،
بەوهۆیەشەوە کانی
تووڕەیی خەڵکی
تێکۆشەری ئەو دەڤەرە
تەقیوەتەوەو دەنگی
ناڕەزاییان بەرزکردۆتەوەو
هاواری خۆیان گەیاندۆتە
لایەنە بەرپرسەکان، کەچی
وەڵام نەدراونەتەوە،
بەناچارییەوە روویان لە
مۆڵگەی سەربازانی تورکیا کردووە،
کەچی ئەوان بە گولـلە وەڵامی خەڵکی
جگەرسووتاویان داوەتەوەو لاوێکیان
شەهیدو دەیانی دیکەشیان
بریندار کردووە، ئەوانیش پەلاماری
سەربازگە و بارەگای سوپای تورکیایان
داوە کە لەو دەڤەرە
بەنایاسایی دروستکراون. لەئاکامدا
مۆڵگەیەکی داگیرکاران
دەستی بەسەردا گیراوەو دەیان
سەرباز دیلکراون و رادەستی هێزەکانی
ناوخۆ کراون. ئێمە لە حزبی رزگاریی
کوردستاندا پشتیوانی لە رابوونەوەی
خەڵکی دەڤەری شیلادزێ و
دێرەلوک و سیرێ دەکەین و
داواکەیان بەڕەوا دەزانین و
دەخوازین کە دەستەڵاتدارانی
هەرێم گوێ لە خواست و داخوازیەکانی
خەڵک بگرن.
ئێمە
لەکاتێکدا کە خواستی دەرچوونی
سەربازانی داگیرکار لە باشووری بە رەوا
دەزانین و دەخوازین کە هەرچی
زووترە تەواوی مۆڵگەکانی سوپای
داگیرکاری تورکیا نەمێنن و
سەربازەکانی تورک لە خاکی باشووری کوردستان
بچنە دەرێ. لەهەمانکاتدا
سەرەخۆشی لەبنەماڵەی
شەهیدان دەکەین و هیوای
چاکبوونەوە بۆ برینداەکان دەخوازین.
مەکتەبى سياسى
حزبی رزگاریی کوردستان
٢٦-١-٢٠١٩