ته‌قینه‌وه‌که‌ی هه‌ولێر  116 کوژراو و برینداری لێکه‌وته‌وه‌

ئاژانسه‌کانی هه‌واڵ رایانگه‌یاند که‌ کاتژمێر 7.30ی ئه‌مڕۆ دووشه‌ممه‌ رێکه‌وتی 20/6/2005  له‌ کاتێکدا پۆلێک پۆلیسی تازه‌کار له‌ گۆڕه‌پانی ته‌نیشت به‌ڕیوه‌به‌رایه‌تی پۆلیسی شاری هه‌ولێر مه‌شقیان ده‌کرد ، تیرۆریستێک به‌ ئۆتۆمۆبیلێکی سوپه‌ری سووره‌وه‌ خۆی گه‌یانده‌ ناو پۆلیسه‌کان و خۆی ته‌قانده‌وه‌ ، له‌ ئاکامدا 12 پۆلیس کوژران و 104ی دیکه‌ش بریندار بوون . به‌گوێره‌ی قسه‌ی پۆلیسه‌ برینداره‌کان ،  ئه‌وان له‌ گۆڕه‌پانێکی بێ شووره‌ و بێ په‌رژیندا  مه‌شقیان پێ کراوه‌ و ته‌نیا  چوار پاسه‌وانیشیان هه‌بووه‌ . به‌ گوێره‌ی قسه‌ی ئه‌وان له‌ سێ لاوه‌  ئۆتۆمۆبیل زۆر به‌ ئاسانی ده‌توانی بێته‌ ناو گۆڕه‌پانه‌که‌وه . ئه‌مه‌ش وایکردووه‌ که‌ تیرۆریسته‌که‌ بێباکانه‌ بگاته‌ مه‌به‌ستی خۆی و له‌ نێو پۆلیسه‌کاندا خۆی بته‌قێنێته‌وه‌ . له‌م پێوه‌ندییه‌دا دانیشتوانی شاری هه‌ولێر ره‌خنه‌ له‌ به‌ڕێوه‌به‌رێتی پۆلیس و ئاسایشی شاره‌که‌ ده‌گرن و به‌ که‌مته‌رخه‌می تۆمه‌تباریان ده‌که‌ن . به‌ داخه‌وه‌ ئه‌مه‌ سێیه‌مین جاره‌ که‌ تیرۆریستان خۆیان ده‌خزێننه‌ ناو ئاپۆڕه‌ی باره‌گای حزب و بنکه‌کانی پۆلیس و ده‌یانکه‌نه‌ ئامانجی خۆیان . له‌ شوباتی ساڵی رابردوودا  دوو تیرۆریست خۆیان گه‌یانده‌ ناو لقی هه‌ولێری پارتی و مه‌ڵبه‌ندی هه‌ولێری یه‌کێتی و خۆیان ته‌قانده‌وه‌ ، به‌مه‌ش زیانێکی گه‌وره‌یان به‌ ئه‌ندامانی ئه‌و لایه‌نانه‌ و میوانه‌کانیان گه‌یاندن  . هه‌روه‌ها له‌ 4ی مایسی ئه‌مساڵیشدا تیرۆریستێک خۆی خزانده‌ ناو ئه‌و هاوڵاتیانه‌ی که‌ له‌به‌رده‌م باره‌گایه‌کی پارتی له‌ هه‌ولێر ،  به‌مه‌به‌ستی پاڵپشتی وه‌رگرتن بۆ ناونووس کردن له‌ ریزه‌کانی پۆلیس وه‌ستابوون ،تیرۆریسته‌که‌ خۆی ته‌قانده‌وه‌ و گورزێکی کاریگه‌ری له‌شاره‌که‌ دا و ژماره‌یه‌ک جگه‌رگۆشه‌ی لێ کوشتن و ژماره‌یه‌کیشی لێ  بریندار کردن   . ئه‌وه‌ ئه‌مڕۆش تیرۆریستێکی دیکه‌ توانی گورزێک له‌ پۆلیسه‌ تازه‌ دامه‌زراوه‌کان بدات و 12 که‌سیان لێ بکوژێت و 104 پۆلیسی دیکه‌شیان لێ بریندار بکات .‌