له ستۆکهۆڵم رژێمی سوریا پرۆتستۆ دهکرێ

لهسهر داوای کۆمیتهی هاوبهشی پارته سیاسیهکانی کورد له سوریا کاتژمێر 15ی ئهمڕۆ 5/4/2008 له گۆڕهپانی سێرگل تۆری شاری ستۆکهۆڵمی وڵاتی سوێد خۆپێشاندانێک بۆ ریسواکردنی رژێمی سوریا بهڕێوهچوو.

جێگهی ئاماژهیه که رۆژی 20/3/2008 هێزهکانی ئاسایشی رژێمی سوریا پهلاماری لاوانی شاری قامیشلۆی رۆژئاوای کوردستانیان دا که دهیانویست بهبۆنهی جهژنی نهورۆزو سهری ساڵی نوێوه مۆم دابگیرسێنن، له ئاکامدا سێ لاوی کورد شههید و ژمارهیهکیش بریندار بوون، ههروهها ژمارهیهکیش قۆڵبهست کران و رهوانهی زیندان کران، ئهم میتینگ و خۆپێشاندانهی کوردستانیانی نیشتهجێی شاری ستۆکهۆڵم بۆ رێزگرتن له گیانی شههیدان و ریسواکردنی رژێمی سوریا پێکهاتبوو که ژمارهیهکی بهرچاو تێیدا بهشداریان کردبوو.

خۆپێشاندانهکه زیاتر له 2 کاتژمێری خایاند، بهشداربوون زۆر به حهماسهوه یادی شههیدانی قامیشلۆیان دهکردهوه، ههم رژێمی سوریایان ریسوا دهکردو ههمیش داوایان له حکومهتی سوید دهکرد که گوشار بخاته سهر رژێمی سوریا تا رێز له مافی مرۆڤ بگرێ و چێتر مافهکانی کورد لهژێر پێ نهنێ.