هێرش بۆ سەر کوردانی
رۆژئاوا ریسوا دەکەین
کۆمەڵانی هەراوی
خەڵکی کوردستان!
ئازادیخوازان و سەربەخۆخوازان!
هێزە سەلەفیەکان و
سوپای بەناو ئازادی سوریا کە
کرێگرتەی دەوڵەت تورکیان
بەمەبەستی بەڕێوەبردنی
پلانەکانی دەوڵەتی تورکیا،
ماوەی چەند هەفتەیەکە هێرش
بۆ سەر ناوچە کوردنشینەکانی
رۆژئاوای کوردستان دەکەن، شۆرشگێڕان و
ئازادیخوازان وەبەرپەلامار دەدەن،
بەهۆی ئەو هێرشانەوە
زیانێکی زۆر بە سەرو گیانی
وڵاتیان کەوتووە، هەروەها
ژمارەیەک وڵاتیش شەهید و
برینداری بوونە. راستیەکەی دوای
ئەوەی چەکدارەکانی سوپای
بەناو ئازاد لە هێرشەکانیاندا بۆ سەر
گەڕەکی ئەشرەفیەی
شاری حەلەب و گوندی قەستەلجەندۆ تێکشکان،
ئێستا بە سیناریۆێکی دیکە
هێرشیان کردۆتە سەر شاری سەروکانی (راس العین)،
دانیشتووانی شارەکە بۆ دەربازکردنی
گیانی خۆیان روویان لە گوندەکانی
دەوروبەرکردوە، هەندێکیش بەرەو
ناوچەکانی ژێر دەستەڵاتی سوپای
تورکیا رۆیشتوون.
بێگومان پیلانەکانی دەوڵەتی
تورکیا لای هەمووان ئاشکرایە، بەهەموو
تواناێکەوە هەوڵدەدات تا زۆرترین
کورد ئاوارە بن و لە زێدی باب و باپیرانیان
هەڵبکەندرێن، پێیوایە لەو
رێیەوە بە مەرامەکانی
خۆی دەگات و دەتوانی کوردانی رۆژئاوا بخاتە
نێو چوارچێوەی سیناریۆو
پیلانەکانی خۆیەوە.
هێرشەکانی سوپای بەناو ئازاد بۆ شاری سەروکانی بەفەرمانی
راستەوخۆی ژەنەڕالەکانی
سوپای تورکیا بەڕێوەدەچێ،
ئامانج ئاوارەبوونی خەڵک
و وێرانکردنی شارەکەیە،
دەیانەوێ بەفەرمی
دەروازەێکی سنووری کۆنترۆڵ
بکەن و لەوێوە کۆمەک و
هاوکاریەکانیان بۆ چەکدارەکان
رەوانە بکەن. ئێمە وەک دوو هێزی
کوردستانی زۆر بەتووندی هێرشەکانی
سوپای بەناو ئازاد بۆ سەر رۆژئاوای کوردستان
ریسوا دەکەین، هەروەها پشتیوانی
خۆمان بۆ کوردانی رۆژئاوا دووپات
دەکەینەوە، بەرگریکردن و
خۆپارێزی بە مافێکی رەوای
خەڵک دەزانین، دەخوازین کە
هێزەکانی رۆژئاوای کوردستان تواناکانیان
چڕتر بکەنەوە، سوپای داگیرکار لەو گوندو
شارانەی رۆژئاوای کوردستان وەدەربنێن
کە هێشتا رزگار نەکراون، هەروەها
پارێزگاریکردن لە ناوچە رزگاکراوەکان
ئەرکێکی نەتەوەیی و
نیشتمانیە بۆیە دەبێ
بەرپەرچی هەموو ئەو هێرش و
پەلامارانە بدەنەوە کە
بەمەبەستی شێواندنی ئاسایشی
ناوچە رزگارکراوەکان ئەنجام دەدرێن.
کوردستانیانی هێژا!
لەوەتەی ئازادیخوازانی
رۆژئاوای کوردستان کۆنترۆڵی گوندو
شارەکانیان کردوە، داگیرکاران پیلانی
ژەهراوی دادەڕێژن،
دەیانەوێ شەڕی کورد بە کورد
هەڵبگیرسێنن، بۆیە
دەخوازین کە هێزە کوردیەکان بە
هۆشیاریەوە رەفتار لەگەڵ
رەوشەکەدا بکەن و یەکڕێزی
نێوانیان تۆکمە بکەن و پارێزگاری
لێبکەن، هەروەها بۆ پاراستنی
بەرژەوەندی دۆزی
نیشتمانەکەمان، پێویستە هێزە
کوردستانیەکان خۆیان بەدوور بگرن لەو دوو
تەوەرەی کە ئەمڕۆ
هاوکێشە ناکۆکەکان لە دەڤەرەکەدا
بەڕێوە دەبەن، چونکە
سەنگەربەندی لەگەڵ هەر
تەوەرێک بە زیانی دۆزی رەوای
گەلەکەمان تەواو دەبێ.
* سەرکەوێ خەبات
لەپێناو کوردستانێکی سەربەخۆ..
* ریسوایی و
شەرمەزاری بۆ داگیرکاران و چلکاوخۆرەکانیان..
دەفتەری سیاسی
پارتی سەربەخۆیی کوردستان
مەکتەبی سیاسی حزبی
رزگاریی کوردستان
٨-١١-٢٠١٢