دەقی پەیامی هاوبەشی ٧ لایەنی سیاسی کوردستانی لە نەورۆزی ئامەد کە رۆژی ٢١ی ئادار بەڕێوە چوو، کە لەلایەن هەڤاڵ رێکار ئەحمەد، سکرتێری گشتی حزبمان، حزبی رزگاریی کوردستان پێشکەش کرا کە ئەمەش دەقەکەیەتی:

نەرۆزتان پیرۆز بێ، هەموو رۆژێکتان نەورۆزی سەرکەوتن بێ

جێی شانازیە کە ئەمڕۆ لە نەورۆزی ئامەد دا بەناوی حەوت لایەنی سیاسی کوردستانی کە بریتین لە (:پارتی سەربەخۆیی کوردستان، بزووتنەوەی دیموکراتی گەلی کوردستان، حزبی رزگاریی کوردستان، کۆمەڵەی زەحمەتکێشانی کوردستان، سازمانی خەباتی کوردستان، پارتی نەتەوەیی کوردستان، بزووتنەوەی رزگاری دیموکراتی کوردستان) جێژنی نەورۆز لە گەلی کوردستان بە گشتی و لەخەڵکی ئامەد بە تایبەتی پیرۆز بکەم. هەروەها زۆر سوپاسی رێکخەرانی مەراسیمی نەورۆزی ئامەد دەکەم کە ئەرک و ماندووبوونیان کێشاوەو بە شێوەیەکی بەرفراوان ئاهەنگی نەورۆزیان سازکردووە، هەروەها سوپاسی هاوسەرۆکانی هەرسێ پارتی هەدەپە، کەجەدەو پەهەدە دەکەم کە بۆ بەشداربوون بە فەرمی بانگهێشتیان کردین و لە جێژنی نەورۆزدا هێزە سیاسیەکانیان لە دەورەی یەکتردا کۆ کردۆتەوە.

بەڕێزان! بەشداربوونمان لە نەورۆزی ئامەد، دووپاتکردنەوەی ئەو پشتیوانیەیە کە سەبارەت بە پرۆسەی ئاشتی لە رابردوودا رامانگەیاندبوو، هەروەها پشتیوانیکردنە لە پەیامەکەی رێبەر ئۆجەلان بۆ بەرقەرارکردنی ئاشت پێشکەشی کردووە هەروەها پەرۆشیمانە بۆ سەرخستنی پڕۆسەی ئاشتی لە تورکیاو رۆژهەڵاتی ناڤیندا.

هەڤاڵانی بەڕێز! ئێستا کە ئێمە لێرە ئاهەنگی نەورۆز دەگێڕین، مخابن هێشتا ئەندازیاری ئاشتی، واتە رێزدار ئۆجەلان لە ئیمرالی لە زیندان دایە، ئازادکردنی رێبەر ئاپۆ خواستی کوردستانیان و ئازادیخوازانی جیهانە،بۆیە لەم بۆنەیەدا دەخوازین کە هەرچی زووترە رێزدار ئۆجەلان ئازاد بکرێ، چونکە لە ژێر رۆشنایی و رێنوێنی ئەودا پڕۆسەی هاشتی بە ئاکام دەگات. هەروەها پشتیوانی لە خەباتی رێبەر ئاپۆ بۆ ئازادی و ئاشتی دەکەین، لەهەمان کاتدا ئێمە بانگ لە سەرۆکی تورکیا رێزدار رەجەب تەیب ئەردۆگان دەکەین کە ئەرکی سەرخستنی پڕۆسەی ئاشتی لە ئەستۆ بگرێ، بۆ بەرقەراکردنی ئاشتی و ئازادی لە تورکیا هەنگاوی کردەیی هەڵبگرێتەوە، چونکە سەرکەوتنی ئەو پڕۆسەیە بە قازانجی خۆی و پارتەکەی و وڵاتی تورکیاو رۆژهەڵاتی ناوەڕاست تەواو دەبێ.
بەڕێزان! هەروەک بۆ هەمووان ئاشكرایە کەچەتەکانی داعش، رێکخراوی داعشی بیرتاریک بەمەبەستی داگیرکردنەوەی خاکی کوردستان و رەشەکوژی خەڵکەکەی بە درێژایی ساڵی رابردوو هێرش و پەلامارەکانی بۆ سەرکوردستان چڕ کردبۆوە بەڵام خۆشبەختانە بە ئازایەتی و بەرخۆدانی پێشمەرگەو یەپەگەو یەپەژەو هەپەکە هەم خاکی کوردستان پارێزراوە هەمیش داعش دووچاری شكست بۆتەوە. هەروەها گومان لەوەدانیە کە بە یەکێتی و یەکڕیزی دەتوانین هەڕەشەکان لە سەر خاک و خەڵک دوور بکرێتەوە. هەروەها نەورۆز بکەین بە رۆژی رزگاری شنگال و سەرجەم ئەو شوێنانەی کە هێشتا لەژێر دەستی داعشدا ماونەتەوە.

بەڕێزان! هیواخوازین ساڵی داهاتوو بە شێوەیەکی بەرفراوانتر لە هەموو شوێنێکی کوردستان، واتە لە نیشتمانێکی ئازادو سەربەخۆو ئاوەداندا پێشوازی لە جێژنی نەورۆزدا بکەین.

لە کۆتاییدا جارێکی دیکەش جێژنی نەورۆزتان پیرۆز بێ، ساڵی نوێتان پیرۆز بێ.