لیستی ژمارە ١١٤

لیستی حزبی رزگاریی کوردستان

 

[وڵاتپارێزی، وەکهەڤی، دادپەروەری]

 

{نیشتمان بۆ هەمووان}

 

 

لیستی رزگاری لە روانگەی باوەڕبوونی بە دیموکراسی، دەخوازێ دەستاودەستکردنی دەستەڵات لە رێی ئاشتیخوازیەوە بەئەنجام بگەیەنێ، بۆ چەسپاندنی بنەماكانی  برایەتی و پێكەوەژیانی ئاشتیانە لە چوارچێوەی کوردستانێکی دیموكراسیدا و لەسایەی  رێزگرتن و پەسندكردنی پرنسیپی هاووڵاتیبوون ، دادپەروەری ، وەکهەڤی و دەستەبەركردنی مافەڕەواكانی نەتەوەی ئاسوری و تورکمان، زامنکردنی مافی ئاینی و ئاینزاکان، هەروەها لەپێناو دابینکردنی خۆشگوزەرانی و پاراستنی ئاسایش و سەقامگیریی وڵات،  رێزگرتن و پەرەپێدانی زمان و كولتووری نەتەوەکانی ناو کوردستان تێدەكۆشێ.

لیستی رزگاری لە پێناو ئەو ئامانجانەدا تێدەكۆشێ :

پرسی نیشتمانی:

کوردستان،نیشتمان و زێدی کوردستانیانە بەبێ لەبەرچاوگرتنی رەگەز، زمان و ئاین، هەمووان لەئەرک و مافدا یەکسانن، بۆ تەواوکردنی ئەو پڕۆسەیە، تێدەکۆشین تا:

 -  ناوچە کوردستانیەکانی دەرەوەی هەرێمی کوردستان بۆ باوەشی هەرێمی کوردستان بگەڕێنەوە .

 - سنووری هەرێمی کوردستان دیاری بکرێ و لەلایەن حکومەتی بەغدادەوە دانیپێبنرێ.

-  لە وڵاتانی جیهاندا نووسینگەی هەرێمی کوردستانی عێراق لەنێو باڵوێزخانەی عێراقدا بکرێنەوە .

 - لە ریفراندۆمێکی ئازادی ژێر چاودێری رێکخراوە نێودەوڵەتیەکان، خەڵکی هەرێمی کوردستان بڕیار لە چارەنووسی خۆیان بدەن.

-  خزمەتی سەربازی لە هێزی پاسەوانی هەرێمدا بەموالیدگیری بێ، بەرپرسانی هێزی پاسەوانی ئەندامی هیچ حزب و رێکخراوێکی سیاسی نەبن و لەنێو هێزی چەکداردا رێکخستنی حزبی نەبێ.

-بۆ کوردستانێکی بێجینۆساید، دەبێ جیهان دان بەوە دابنێ کە جینۆساید دژ بە گەلی کوردستان ئەنجام دراوە.

 

پرسی ئابووری و چارەسەرکردنی بێکاری

-ئابووری کوردستان لە مۆنۆپۆڵکردن و پاوانکردن دەربهێنرێ و سامانی هەرێم بۆ هەموولایەک ئاشکرا بکرێ.

-باجی هەڵکشان لەسەر بازرگانان و دەوڵەمەندان دابنرێ، سەرچاوەی داهات بۆ لایەنی پەیوەنددار ئاشكرا بکرێ.

-بیمەی کۆمەڵایەتی لەسەر شێوەی سیستەمی سۆسیال بۆ خەڵکی کوردستان دابین بکرێ.

لە کەرتی گشتی و تایبەتدا، لە کارکردنی پڕۆژەکانی ناو هەرێمی کوردستاندا زێدەماف بۆ کرێکارانی خۆماڵی مسۆگەر و سەرپشک بکرێ .

-بانکێکی تایبەت بۆ پشتیوانی کردن لە لاوان  و ژنان بکرێتەوەو قەرزی درێژخایەنیان پێبدات.

-لە داهاتی نەوت و غازدا، پشکی تایبەت بۆ خەڵک دابین بکرێ .

پرسی خزمەتگوزاری و  كۆمەڵایەتی

- دابینکردنی بیمەی تەندروستی، بایەخ و گرنگیدان  بەسیستەمی نەخۆشخانە گشتییەكان.

- نەهێشتنی نەخۆشخانەی ئەهلی و کەرتی تایبەت.

- دابینکردنی شوێنی نیشتەجێبوون، ئەمەش لەڕێ دروستکردنی یەکەی نیشتەجێبوونی دەوڵەتیەوە مسۆگەر بکرێ،

- هەڵوەشاندنەوەی خوێندنی تایبەت و گێڕانەوەیان بۆ  وەزارەتی پەروەردەو پێشخستنی بەرنامەی خوێندن.

- بە خۆڕاییکردنی خوێندن لە هەموو خوێندنگەو پەیمانگەو زانکۆکاندا.

- لە رێی کردنەوەی خول و کۆرسی بەهرەو تواناسازی، گرنگی و بایەخ بە توانای لاوان و بێکاران بدرێ.

- بەرنامەی گونجاو هەڵبگیرێتەوە تا کەسە دابڕاوو زیانلێدراوەکان بۆ نێو کۆمەڵ بگەڕێندرێنەوە.

- بایەخی زیاتر بە بوارەکانی وەرزش بدرێ، پێوەرێکی گونجاو بۆ هاوکاری یانەکان دابنر‌ێ.

- کۆتایی بە سیاسەتی هاوێرکردنی لە نێوان ژن و پیاو بهێنرێ، پێشینەی هاوسەرگیری زیاد بکرێ.

- بەڕێوەبەرێتی کار لە شارو شارۆچکەکاندا خولی فێربوون بۆ ژنان  لەبوارە جۆراوجۆرەکاندا بکاتەوە.

 

پرسی ژینگەو ئاوەدانکردنەوە

- لە رێی دروستكردنی بەنداوەوە ئاوی باران کۆبکرێتەوە، لە بواری كشتوكاڵ و دەستكەوتنی تەزووی كارەبا و كەرتی  گەشتوگوزار سوودی لێوەربگیرێ .

- گرنگی بە ئاودێری و دانانی وێستگەی پاكژكردنەوەی پاشماوەكانی ئاوی بەكارهاتوو بدرێ .

-لە رۆخ جادە گشتیەکاندا شوێنی دانیشتن و حەسانەوە دروست بکرێن و پێداویستی نوژداریان بۆ دابین بکرێ.

- گرنگی بە ناوچەی سەوزایی لە شار و شارۆچكەكان و ناوچە ئاوەدانییەكان بدرێ.

- كاراكردنی فەرمانگەكانی كۆنتڕۆڵی جۆری، بۆ ئەوەی بە کردەوە رێ لە هێنان و بەکاربردنی كاڵا و دەرمانی زیانبەخش بۆ مرۆڤ و ژینگە بگیرێ.

- ئاوەدانکردنەوەی گوندەکان بە شێوازی هاوچەرخانە، هەم بۆ دروستکردنی خانووی هاوچەرخ پێشینەی بە دانیشتوان بدرێ، هەم خزمەتگوزاریە سەرەتاییەکانی وەک ئاو، ئاوەڕۆ، کارەبا و تەندروستیان بۆ دابین بکرێ.

- بەمەبەستی زیاترکردنی بەرهەمی کشتوکاڵی، هاریكاری جوتیاران  بکرێ وپێداویستی كشتوكاڵیان بۆ دابین بکرێ .

- بەمەبەستی زیادکردنی بەرهەمی خۆماڵی، هانی دامەزراندنی پڕۆژەی ئاژەڵداری و بەخێوكردنی پەلەوەر و ماسی  بدرێ .