راگەیاندراوێک سەبارەت بە هەڵبژاردنی شارەوانیەکانی کانتۆنی جزیرە

ئەمڕۆ ١٣-٣-٢٠١٥، هەڵبژاردنی ئەنجوومەنی شارەوانیەکان لە کانتۆنی جزیرە بەڕێوەچوو، بەوبۆنەیەوە پیرۆزبایی لە خەڵکی رۆژئاوای کوردستان و دانیشتووانی کانتۆنی جزیرە دەکەین. ئەمە یەکەمین جارە لە مێژوودا خەڵکی رۆژئاوای کوردستان بە ئازادانە دەنگی خۆیان بدەن. مخابن هەندێک لایەنی رۆژئاوا لەبەر هەر هۆیەک بووبێ، بەشداریان لە هەڵبژاردنەکەدا نەکردو کشانەوە، ئەوەش پێوەندی بە سیاسەتی خودی لایەنەکان خۆیانەوە هەیە، بەڵام ئەوەی جێی سەرسووڕمانە کە سەرۆکایەتی هەرێم لەو پێوەندەدا بەیاننامەیەکی بڵاوکردۆتەوە، کە تێیدا هاتووە: (ئەو هەڵبژاردنە مایەی قەبوڵکردن نیە!!)، کوردستانیان خوازیاربوون کە سەرۆکایەتی پشتیوانی راشكاوانە لەو هەنگاوە مێژووییەی رۆژئاوا بکات، بەڵام بەیاننامەکە پشتیوانیکردنێکی ئاشکرایە لە هەندێک لایەنی مەیلدار کە بەشداریان لە هەڵبژاردنەکەدا نەکردووە، هەروەها دەستتێوەردانێکی ئاشكرایە لە کاروباری نێوەخۆی کانتۆنەکانی رۆژئاوا.

ئێمە لەکاتێکدا جارێکی دیکەش پشتیوانی خۆمان بۆ کانتۆنەکانی رۆژئاوا دووپات دەکەینەوە، هەروەها بەڕێوەبردنی هەڵبژاردنیش بە هەنگاوێکی ئەرێنی بۆ بەرەو دیموکراتیزەکردنی رۆژئاوا لێکدەدەینەوە، لەهەمان کاتدا پێمانوایە کە دەستتێوەردان خزمەت بە کیشەی نەتەوەیی و یەکڕیزی کوردستانیان ناکات، لەم روانگەیەوە دەبوایە سەرۆکایەتی هەرێمی کوردستانی هانی لایەنەکانی ناو ئەنەکەسەی بدابوایە تا بەهەر نرخێک بێ بەشداری لە هەڵبژاردندا بکەن، هەروەها ئاسانکاری بۆ چوونی رۆژنامەوانان و چاودێران بکردبوایە، پێمانوایە لەم کاتەدا ئەو رەفتارو هەڵوێستەی سەرۆکایەتی هەرێمی کوردستان لە جێی خۆیاندانین و بە زیانی دۆزی رەوای گەلەکەمان و پڕۆسەی دیموکراسی تەواو دەبێ.

 

مەکتەبی راگەیاندنی

حزبی رزگاریی کوردستان

١٣-٣-٢٠١٥