رۆژی هاوپشتی کرێکاران پیرۆز بێ

یەکی ئایار، رۆژی هاوپشتی چینی کرێکارانی جیهان، لە کرێکارانی کوردستان و سەرجەم کرێکارانی جیهان پێرۆز بێ. راستییەکی مێژووییە کە بە هەوڵ و تێکۆشان، بە خەباتی چینی کرێکار و ستەمدیدەکان، سەرەنجام یەکی ئایار بوو بە رۆژی لە گۆڕنانی ستەمکار و سیستەمی سەرمایەداری.

ئەمڕۆ لە کاتێکدا یەکی ئایار دێتەوە کە هێشتا چینی کرێکارو بەشمەینەتانی کوردستان لە رەوشێکی بژێوی یەکجار ناخۆشدا بەدەست بێکاری، گرانی و نەدارییەوە دەناڵێنن، هێشتا دەستەڵاتدارانی باشوور ئاوڕ لە رابردوو نادەنەوەو پێوانە بۆ بژێوی بەشمەینەتان ناکەن. دەستەڵاتدارانی باشوور نەک هەر بۆ یەکسانی و وەکهەڤی هەنگاو هەڵناگرنەوەو کار بۆ بنبڕکردنی چەوسانەوەی چینایەتی ناکەن، بەڵکو زۆر شێلگیرانەو لێبڕاوانە درێژە بەستەمکاری دەدەن و بازاڕی سەرمایەداری گەشە پێدەدەن. دەستەڵاتدارانی باشوور نەک هەر لە وڵاتپارێزی دوور کەوتوونەتەوە، بەڵکو لەبەرانبەر هەڕەشەکانی داگیرکاراندا ورتەیان لێوەنایەت و وەڵامی ئەو بانگەشانەی تورکیاش نادەنەوە کە قودس و دڵی کوردستان بە شارێکی تورکمانی ناودێر دەکات، بۆیە کاتی ئەوە هاتووە کە کارێکاران و ستەمدیدەکانی کورستان گوڕوتینێکی نوێ بە خەباتی خۆیان بدەن، کۆتایی بە ستەمکاران بهێنن و دەستەڵاتی بنەماڵەیی لە گۆڕ دەنرێ.

شکۆداربێ یەکی ئایار، رۆژی هاوپشتی کرێکاران.

سڵاو لە کرێکارو رەنجدەرانی کورستان.

مەکتەبی راگەیاندنی
حزبی رزگاریی کوردستان
2019-05-01