بیست و هەشتەمین ساڵیادی راپەڕینی باشوور پیرۆز بێ

کۆمەڵانی هەراوی خەڵکی کوردستان!
سەربەخۆخواز و ئازادیخوازان!
ئەمڕۆ (٤)ی ئازار، بیست و هەشتەمین ساڵیادی راپەڕینە مەزنەکەی باشووری کوردستانە، بەوبۆنەیەوە پیرۆزبایی لە کوردستانیان دەکەین و سڵاوی ئەمەک و وەفاداریش بۆ گیانی پاکی شەهیدانی رێی رزگاریی نیشتمان دەنێرین و بەڵینیان بۆ نوێ دەکەینەوە کە تا گەیشتن بە وێستگەی سەربەخۆیی، تێکۆشان درێژەی دەبێ.

کۆمەڵانی هەراوی خەڵکی کوردستان!
هەموومان دەزانین کە رۆژی ٤ی ئازاری ١٩٩١، خەڵکی ئاخێندراوی نێو کۆمەڵگەی زۆرەملێی خەبات دژ بە رەفتاری چلکاوخۆرانی رژێم و پیاوانی ئەمنی بەعس راپەڕین و پەلاماری بنکەی ئەمنی کۆمەڵگەکەیان دا، سەربازانی رژێم بە گولـلە وەڵامی خەڵکیان دایەوە، کەسێکیان شەهیدو ژمارەیەکیشیان لێ بریندار کردن، بەڵام جەماوەری راپەڕیوو پاشەکشەیان نەکرد و پیاوانی رژێمیان وەدەرنا. رۆژی دواتر، واتە پێنجی ئازار، جەماوەری شاری رانیە دژ بە سوپای داگیرکار راپەڕین و شاربەدەریان کردن، بەوهۆیەشەوە هیواو ئومێدیان بۆ گەل گەڕاندەوە و بلێسەی راپەڕین هەموو شارو گوندەکانی باشووری گرتەوەو سوپای بەعس راماڵدراو باشوور رزگار و ئازاد بوو، بەوهۆیەوە دەرفەتێکی باش بۆ لایەنە سیاسیەکانی ئەو دیو سنوور رەخسا تا بگەڕێنەوە نێو خاکی باشوور و دەستەڵاتدارێتی تێدا بکەن. مخابن هەر زوو دیارەی داگیرکردن و تاڵانکردن و رفاندن پەڕەی سەندو زۆرینەی دامەزراوە فەرمیەکان و شوێنە گشتیەکان تاڵان کران و ئاودیو کران، بەوهۆیەشەوە جارێکی دیکە نەهامەتی و بێباوەڕی باڵی بەسەر باشووردا کێشایەوە.
ئەمساڵ لەگەڵ هەواڵی نەمانی رێکخراوی بیرتاریکی داعش لەسەر دەستی شەڕڤانانی رۆژئاوای کوردستاندا، ساڵیادی راپەڕینی باشوور دەکەینەوە،، بەڵام مخابن هێشتا قەیران و تەنگژەکانی باشوور کۆتاییان پێنەهاتووە. دوای تێپەڕبوونی پێنج مانگ بەسەر هەڵبژاردنی پەرلەمان، کەچی هێشتا کابینەی نوێ پێکنەهاتووە، ریزەکانی نێوەخۆیش بەرەو لێکترازانی زیاتر رۆیشتووە.گومانی تێدانیە کە دەستەڵاتدارانی گەندەڵ و ستەمکار هۆکاری سەرەکی ئەو قەیران و تەنگژانەن.
ئەمڕۆ یادی بیست و هەشتەمین ساڵڕۆژی راپەڕینە پڕشکۆکەی باشوور دەکرێتەوە، کەچی لەجیاتی مسۆگەرکردنی ئامانج و خواستەکانی راپەڕین و سڕینەوەی داگیرکاری، ئێستا خاکی باشوور بە مۆڵگەی سەربازانی تورک کراوە و کاڵای تورکی و ئێرانی بازاڕایان داگیرکردووە.
ئێمە لەحزبى رزگاریی کوردستاندا، لەبەرانبەر پشت گوێ خستنی خواستەکانی خەڵک و لەژێر پێنانی ئامانجەکانی راپەڕینی ١٩٩١ و بێ هیواکردنی خەڵک، دەستەڵاتدارانی هەرێم بە بەرپرسیار دەزانین، مخابن ئێستاش بێباکانە درێژە بە سیاسەتی برسیکردنی خەڵک دەدەن، شەڕی پۆست لەگەڵ یەکدیدا دەکەن و بەرژەوەندی خۆیان بەسەر بەرژەوەندی گەل و نیشتماندا دەسەپێنن. ئەم دەستەڵاتە لە پرسی چارەنووسی خەڵک خەمساردو بێتوانایە، شیانی چارەسەرکردنی کێشەو قەیرانەکانی نیە؛ سیاسەتی داپۆشینی قەیران بە قەیران پێڕۆ دەکات، دەیەوێ لەو رێیەوە قەیرانەکان بشارێتەوەو لەبیر خەڵکیان بباتەوە، بۆ ئەو مەبەستەش سیاسەتی داپۆشین، چەواشەکاری، بێ ئیرادەکردن، خامۆشکردنی دەنگی ئازاد، فریودان و خاپاندنی سەرپشک کردووە. لە پێوەند بەو مەرگەساتانەی کە بەسەر خەڵک و باشووری کوردستانیان داهێناوە، بەهۆی ئەو تاڵانیەی لەسامانی نیشتماندا کردوویانە، دەبێ لێپرسینەوەیان لەگەڵدا بکرێ و رووبەرووی دادگە بکرێنەوە، چونکە تەنیا لەو رێیەوە ئامانجەکانی راپەڕین نۆژەن دەبنەوەو بە ئاکام دەگەن.
شکۆداربێ بیست وهەشتەمین ساڵڕۆژی راپەرین .
سەرکەوتوو بێ خەبات لە پێناو کوردستانێکی سەربەخۆو گەلێکی بەختیاردا

مەکتەبى سیاسى
حزبى رزگاریی کوردستان
٢٠١٩-٣-٤