١٥ی ئاب، ساڵڕۆژی راگەیاندنی رزگاری و بڕیاری سەربەخۆییە

کۆمەڵانی هەراوی خەڵکی کوردستان!

سەربەخۆخواز و رزگاریخوازان!

ئەمڕۆ ١٥ی ئابی ٢٠١٧، حزبی رزگاریی کوردستان بیست وپێنجەمین مۆمی تەمەنی خۆی دادەگیرسێنێ، بەوبۆنەیەوە پیرۆزباییلە وڵاتپارێزو سەربەخۆخوازان دەکەین و سڵاوی ئەمەک و وەفاداریش بۆ گیانی پاکی شەهیدانی رێی رزگاری و سەربەخۆیی دەنێرین، پەیمانیان بۆ دووپات دەکەینەوە کە تا گەیشتن بە نیشتمانێکی سەربەخۆو کۆمەڵگەیەکی بەختەوەر رێیان پڕ رێبوار دەمێنێتەوە و کاروانی تێکۆشان درێژەی دەبێ.

کوردستانیانی رزگاریخواز! مخابن، ئەمساڵیش کە یادی راگەیاندنی رزگاری دەکەینەوە، هێشتا باشووری کوردستان لەنێو قەیرانەکاندا دەتلێتەوە، بەهۆی سیاسەتی تەسکی حزبایەتیەوە، بەهۆی سیاسەتی پاوانخوازی و کورتبینی بەرپرسەکانەوە، جەماوەری ستەمدیدەی کوردستان دووچاری چەندین گرفت و کێشەی بژێوی، سیاسی و ئابووری کراونەتەوە، هیچ هەنگاوێکیش بۆ راستکردنەوەی هەڵە و کێماسیەکان هەڵنەگیراونەتەوە.

ئەمڕۆ کە ساڵیادی راگەیاندنی رزگاری دەکەینەوە، وەکو ساڵانی رابردوو بەهۆیپەرتەوازەیی و هاوێربوونی نێو ماڵی کوردەواری و لەژێرپێنانی سەروەری نیشتمانیەوە داخبارین، چونکەبەرپرسانی حکومەتی هەرێم بێباکانە درێژە بە سیاسەتی شکستخواردووی خۆیان دەدەن، ئاوڕ لە مەرگەساتەکانی خەڵک نادەنەوەو نرخ و بەهاش بۆ داخوازی خەڵکی کوردستان دانانێن.

ئەمڕۆ کە ساڵیادی رزگار دەکەینەوە، بە شێوەیەکی بەرفراوان باس لە بەڕێوەبردنی ریفراندۆم دەکرێ و بڕیاریش وایە کە رۆژی ٢٥ی ئەیلول بەڕێوەبچێ، بەوهۆیەوە خۆشحاڵین، چونکە راستبینی و دووربینی بۆچوونەکانی حزبی رزگاری سەرراست دەکاتەوە. حزبی رزگاری یەکەمین لایەنی سیاسی کورستان بوو کە لە ١٥-٨- ١٩٩٣ بۆ یەکلاییکردنەوەی کێشەی رەوای کوردستان، دروشمی بەڕێوەبردنی ریفراندۆمی بەرزکردەوە؛ ئەوێ رۆژێ کەسان و لایەن هەبوون بە سوکایەتیەوە لەو دروشمەیان دەڕوانی و دژایەتیان دەکرد، بەڵام خۆشبەختانە ئێستا ئەوانیش لە راستی و گرنگی بەڕێوەچوونی ریفراندۆم تێگەیشتوون و بانگەشەی بۆ دەکەن. حزبی رزگاریی کورستان کە راستوێژانە بۆ رزگاری و سەربەخۆیی تێکۆشاوە، پشتیوانی لە بەڕێوەچوونی ریفراندۆم بۆ سەربەخۆیی دەکات، هەر جۆرە سەوداو مامەڵەیەکیش بۆ بەرژەوەندی حزبایەتی و کەسایەتی لە قاودەدات و پاشگەزبوونەوە لە بەڕێوەچوونی ریفراندۆمیش بە هەڵەیەکی کوشندە دەبینێ. لەهەمان کاتدا جەخت دەکاتەوە کە نابێ لەژێر پاساوی هەوڵدان بۆ سەربەخۆیی، چاوپۆشی لە گەندەڵی و ستەمکاری ئەو بەرپرسانەدا بکرێ کە بە درێژایی بیست و شەش ساڵی رابردوو پێیان لە بەرژەوەندی باڵای گەل و نیشتمان خشاندووە و جەماوەریان برسی کردووە، پۆست و پێگەی خۆیان بۆ بەرژەوەندی کەسێتی دەکارکردووە، بەدوای کۆکردنەوەی سەروەت و سامان کەوتوون و هاودەستیان لەگەڵ داگیرکاراندا کردووە.

پێکهێنانی دەوڵەتی سەربەخۆی کوردستان، خواست و ئامانجی هەر کوردستانیێکی وڵاتپارێزە، تێکۆشان بۆ رزگاری و سەربەخۆیی گەل و نیشتمان، ئەرکێکی نەتەوەیی و نیشتمانی و مرۆڤایەتیە، بۆیە نابێ لەو پەنایەوەهەڵەو تاوان و ستەمی ئەو بەرپرسانە بشاردرێتەوەکە باشووری کورستانیان دووچاری قەیران، نەهامەتی و برسێتی کردۆتەوە. ئێمە داوا دەکەین کە بەر لە بەڕێوەچوونی ریفراندۆم رەوشی یاسایی و سیاسی ئاسایی بکرێتەوە، هەنگاوی راستوێژانە بۆ چاککردن و باشکردنی بژێوی خەڵک هەڵبگیرێتەوە، بڕیاری پاشەکەوتی مووچەهەڵبوەشێندرێتەوە، فرۆشتنی نەوت و چۆنێتی سەرفکردنی داهاتەکەی ئاشكرا بکرێ، ریفراندۆم لە تەواوی باشووری کوردستانیەکاندا بەڕێوەبچێ و ناوچە دابڕێندراوەکان هاوێر نەکرێن.هەروەها خوازیارینکە لە دوای پڕۆسەی ریفراندۆم و پێکهێنانی دەوڵەتی سەربەخۆدا، دادگەی گەل لێپرسینەوە لەوانە بکات کە دامەزراوە شەرعیەکانیان پەکخست،نیشتمانیان دادۆشینی و دەستیان بەسەر قوتی خەڵک داگرت. نابێ بە بیانۆی جۆراوجۆرەوە تاوانکاران و هاودەستانی داگیرکاران ببەخشرێن و دەرباز بکرێن.ئێمە لە حزبی رزگاریی کورستاندا پێداگری لەسەر ئاشكراکردنی پەروەندی ئەوانە دەکەینەوە کە بازرگانیان لەگەڵ داعش دا کرد، پێداویستیەکانیان بۆ دابین کردن و هاوکاریان کردن.

لە ساڵیادی راگەیاندنی رزگاریدا، جارێکی دیکەش سڵاو لە هێزی پێشمەرگەی باشووری کوردستان دەکەینکە بۆ پارێزگاریکردن لە خەڵک و خاکی کورستان، بە درێژایی سێ ساڵی رابردوو ئازایانە بەرسنگیان لە چەتەکانی داعش گرت، مەردانە شەڕی داعشیان کرد و سەرکەوتنیان مسۆگەر کرد.

لە ساڵیادی رزگاریدا سڵاو لە شەڕڤانانی رۆژئاوای کوردستان دەکەین کە ئازایانەو مەردانە هێزی داعشیان بە چۆک داهێناو بەشێکی زۆری رۆژئاوای کوردستانیان رزگارکرد و هاوسۆزی نێودەوڵەتیان بۆ وەدەستهێنا و ئێستاش وەک سومبولی بەرخۆدانو تێکۆشان دەناسرێن.

- بەڵێ بۆ سەربەخۆیی کورستان.

- شکۆدار بێ ١٥ی ئاب، ساڵڕۆژی راگەیاندنی رزگاری.

- سەرکەوتوو بێ خەبات لەپێناو کوردستانێکی سەربەخۆ و گەلێکی بە ختیاردا.

مەکتەبی سیاسی

حزبی رزگاریی کوردستان

١٥-٨-٢٠١٧