بودجەو قەیرانەکانی دیکە

لەم رۆژانەی دواییدا مشتومڕ لەسەر خستنەڕووی بوارەکانی بودجە لەلایەک و پەسەندکردن و تێپەڕکردنی لەلایەکی دیکەوە، کێشەو قەیرانێکی دیکەی بە دوای خۆیدا هێناوە. لایەنەکانی ئۆپۆزیسیۆن دەیانەوێ هەموو بوارەکانی بودجە روون بکرێنەوە، سەرچاوەو بڕەکانی داهات دیار بکرێن، لەژێر رۆشنایی داهاتدا مزاختن و سەرفکردن ئاشکرا بکرێ، هەرچی فراکسیۆنی کوردستانیشە دەیەوێ چیتر بازاڕ پەکی نەکەوێ و بودجە پەسند بکرێ.. ئەو دوو رامانە جیاوازەش قەیرانێکی بەرهەمهێناوەو شەقامی کوردستانی بەخۆیەوە خەریک کردوە. لەو پێوەندەدا ژمارەیەک رۆشنبیرو چالاکوانی کۆمەڵی مەدەنی کۆبوونەتەوەو دەستەیەکیان بەناوی دهستهی بهرگری جهماوهری له بودجه پێکهێناوە. ئێستا ئەم دەستەیە کەوتۆتە خۆی و دەیەوێ چالاکی جۆراوجۆر لە فەتسبووک، مێدیاو شەقامی شارەکاندا بەڕێوە ببات.

راستیەکەی بودجەی کوردستان زۆر دواخراوە، دەبوایە چەندین مانگ لەمەوبەر رەوانەی پەرلەمان بکرابوایەو دەنگی لەسەر بدرابوایە تا جومگەکانی بازاڕی کوردستان شل نەبنەوە.. مخابن بەهۆی راگرتنی پێشینەی هاوسەرێتی و خانووبەرەو کشتوکاڵی زیانێکی گەورە بە جەماوەر کەوتووە، دواخستنیشی زیانەکە گەورەتر دەکاتەوە، بەڵام ئەمەش بەو واتایە نیە بەبیانۆی دواکەوتنیەوە چاو لە کەموکورتی و گەندەڵیەکانی مزاختنی بپۆشرێ. لەو پێناوەدا وادەخوازێ کە پەرلەمانتاران بیر لە روانگەی حزبەکانیان نەکەنەوەو بەرژەوەندی گشتی بکەنە ئامانج، لە کورتترین کاتدا قوژبنە تاریکەکان رۆشن بکرێنەوەو بودجەش پەسند بکرێ.

لەلایەکی دیکەوە هێشتا قەیرانی نێوان بەغدادو هەولێر کۆتا نەبووە، هێشتا لادان و مانەوەی مالکی لە پۆستی سەرۆکوەزیران یەکلایی نەبۆتەوە، هێشتا نازاندرێ ئەگەر مالکی لابدرێ کێ جێیدەگرێتەوە؟! ئەوەی کورسیەکەی مالکی پڕ دەکاتەوە تا چ ئەندازەیەک باوەڕی بە مافی نەتەوەی کورد هەیە؟! ئایا راستوێژانە بۆ جێبەجێکردنی ماددەی ١٤٠ و گەڕانەوەی ناوچە دابێندراوەکان کار دەکات؟؟! ئایا ئەو کەسە بوێری ئەوەی تێداهەیە کە کێشەی نەوت، پێشمەرگەو رێژەی بودجە چارەسەر بکات؟!

لەهەمان کاتیشدا نازاندرێ کە ئەگەر لە سەندنەوەی متمانە لە مالکی هەڵوەستە بکرێت و پاشگەز ببنەوە چی دەقەومێ؟! ئایا مالکی ئامادە دەبێ ناکۆکیەکان چارەسەر بکات و واز لە تاکڕەوی بهێنێ؟! ئایا مالکی دەستەڵاتە قۆرخکراوەکان رادەستی دیتران دەکاتەوە؟!

بۆ یەکلایی کردنەوەی ئەو شیمانەو ئەگەرانە وا دەخوازێ کە کوردستانیان ناو ماڵی خۆیان نەشێوێنن و لەیەکتر دوور نەکەونەوە، هەم بودجەی کوردستان بەو شێوەیەی کە خواستی خەڵکە بەڕێ بخرێ هەمیش هاوئاهەنگ ململانێکان لەگەڵ بەغداد بەرەو سەرکەوتن ببەن.