سڵاو بۆ رزگاری لە ساڵیادی
راگەیاندنیدا
کۆمەڵانی
هەراوی خەڵکی کوردستان!
رزگاریخوازو
سەربەخۆخوازان!
دۆست
و لایەنگرانی حزبی رزگاری!
لە
١٥ی ئابی ئەمساڵدا حزبی رزگاریی
کوردستان بیست و دووەمین مۆمی تەمەنی
خۆی دادەگیرسێنێ، بەوبۆنەیەوە
پیرۆزبایی لە خۆمان و کوردستانیان و تێکڕای
سەربەخۆخوازان دەکەین، هەروەها سڵاوی
ئەمەک و وەفاداری بۆ گیانی پاکی
شەهیدانی رێی رزگاری و سەربەخۆیی
کوردستان دەنێرین و پەیمانیان بۆ
دووپات دەکەینەوە کە تاگەیشتن بە
نیشتمانێکی سەربەخۆو کۆمەڵگەیەکی
بەختەوەر تێکۆشان درێژەی دەبێ.
لە
١٥-٨-١٩٩٣دا، بەراگەیاندنی
حزبی رزگاریی کوردستان، خواستی سەربەخۆخوازی پێینایە
قۆناغێکی نوێوە، هەم سەنگەری
تێکۆشان بەئاوەدانی مایەوە، هەمیش
دروشمی بەرێوەبردنی ریفراندۆم بۆ
یەکلایی کردنەوەی پرسی کوردستان
وەک خەباتێکی سەردەمیانە هێنرایە
رۆژەڤەوە. بەوهۆیەوە
لاپەڕەێکی نوێ لە مێژوودا نووسرایەوە،
حزبی رزگاری بوو بەپێشەنگی خواستی بەڕێوەبردنی
ریفراندۆم، ئەگەرچی ئەوێ رۆژێ
حزبی رزگاری بەتەنیا بوو، بەڕێوەبردنی
ریفراندۆم بە خەون لێکدەدرایەوە،
بەڵام خۆشەبەختانە ئێستا هەمووان
لە دەوری ئەو دروشمەدا کۆبوونەتەوەو
بانگی بەڕێوەبردنی دەدەن. بەوهۆیەشەوە
شانازیێکی گەورە بۆ رزگاری و رزگاریخوازەکان
تۆمارکراوە.
ئەمساڵ
لە رەوشێکی ئاوارتەدا ساڵیادی
راگەیاندنی رزگاری دێتەوە، خۆشبەختانە
کوردستانی نیشتمان راوەستاوانە رێی لە
شاڵاوی دووەمی ئەنفالکردن گرتووە، بەعس
لە بەرگی داعشدا هاتۆتەوەو هێرش و پەلامارەکانی
خۆی بۆسەر کوردستان چڕ کردۆتەوە،
کوردستانیش بەیەکگرتوویی پارێزگاری
لە خۆی دەکات، بەکردەوە هاوهەنگی
لەنێوان هێزەکان هاتۆتە ئاراوە، داعش و
دوژمنانی گەل دووچاری شکست هاتوون و پیلانەکانیان
پوچەڵ دەبێتەوە. بەوبۆنەیەوە
بەتووندی نەفرەت لە داعش و هاودەستانیان
و وڵاتە تیرۆرپەروەرەکان دەکەین،
جارێکی دیکەش سڵاو گەرمی خۆمان پێشكەش
بەو تێکۆشەرانە دەکەین کە
ماندوونەناسانە لەسەنگەری بەرگریدان
و کوردستان دەپارێزن. هەروەها سوپاسی هەموو ئەو
وڵاتانە دەکەین کە هاتوونەتە مەیدان
و پشتیوانی لە خەڵکی کوردستان دەکەن
و هێرشی ئاسمانیان بۆ سەر مۆڵگەکانی
داعش دەستپێکردووە.
لە
ساڵیادی رزگاریدا داخباری خۆمان رادەگەیەنین،
چونکە بەهۆی هێرشەکانی داعشەوە،
کارەساتێکی مرۆیی گەورە بەرۆکی
دەڤەری شنگالی گرتووە، سەدان ئێزدی
سڤیل شەهید کراون، دەیان هەزار کوردی
ئێزدی ئاوارەن، بۆ دەربازکردنی گیانی
خۆیان زێدی باپیرانیان جێهێشتووەو
روویان لە چیاکان کردوە، دەیان ژن و زارۆک
و بەساڵاچوو گیانیان لەدەست داوە، ئەوەش
بەرپرسارێتی خستۆتە ئەستۆی حکومەتی
هەرێم و کوردستانیان تا بەپەلە بەهاواریانەوە
بچن و دەربازیان بکەن و ژیانیان بۆ بگێڕنەوە.
هەر لەو پێوەندەدا داوا لە کۆمەڵی
نێودەوڵەتی و وڵاتە زلهێزەکانی
جیهان دەکەین کە بەکردەوە بەهانای
لێقەوماوانەوە بچن و هاوکاری و کۆمەکی
ئەوانە بکەن کە هێشتا لە چیاکاندا ماونەتەوە.
هەر بۆ ئەو مەبەستەش خوازیارین کە
کۆمەڵی نێودەوڵەتی پشتیوانی
زیاتر لە حکومەتی هەرێمی کوردستان
بکات.
لە
ساڵیادی راگەیاندنی رزگاری دا پشتیوانی
خۆمان بۆ حکومەتی باشووری کوردستان و هێزی
پێشمەرگە دووپات دەکەینەوەو بەهەموو
تواناێکەوە پارێزگاری لە نیشتمانەکەمان
دەکەین. ئێمە بەگەشبینیەوە
لە ئاسۆی داهاتوو دەڕوانین و پێمانوایە
کە پێکهێنانی دەوڵەتی سەربەخۆی
کوردستان نزیکە، تەنیا لەو رێیەشەوە
خەڵک و خاکی نیشتمانەکەمان پارێزراو دەبن.
- شکۆدار بێ ١٥ی ئاب، ساڵڕۆژی
راگەیاندنی رزگاری.
- سەرکەوتوو بێ خەبات لە پێناو
کوردستانێکی سەربەخۆو گەلێکی بەختیار.
- نەفرەت لە داعش و هاودەستانیان.
- نەمری و سەربەرزی بۆ
شەهیدانی رێی رزگاری و سەربەخۆیی
کوردستان
مەکتەبی سیاسی
حزبی رزگاریی کوردستان
2014-08-15