ئازادی بۆ ئۆجەلان لە ساڵڕۆژی پیلانگێڕی رفاندنیدا

 

رۆژی ١٥ی شوبات ساڵڕۆژی رفاندنی رێزدار عه‌بدوڵڵا ئۆجەلان، سەرۆکی پارتی کرێکارانی کوردستانە، کە رێبەرێکی مەزنی خەباتی رزگاریخوازی گەلی کوردستانە، ئەو رۆژە له‌ دڵ و ویژدانی هه‌ر مرۆڤێکی کوردستانیدا یادێکی ناخۆش و برینێکی پرسۆیە، چونکە لە ١٥ی شوباتی ساڵی ١٩٩٩دا دەزگەی هەواڵگری تورکیا بە هاودەستی لەگەڵ دەزگەی سیخوڕی وڵاتانی هاوپەیمانیدا، لە پیلانێکی ترسناکدا رێزدار عەبدوڵڵا ئۆجەلان رێبەری پارتی کرێکارانی کوردستانی لە وڵاتی کینیاوە بەرەو تورکیا رفاند و زیندانی کرد، ماوەی شازدە ساڵە کە رێزدار ئۆجەلان لە دوڕگەی ئیمرالیدا زیندانی کراوە، بەڵام کاروانی خەباتەکەی گەشاوەو بەردەوامە، بەوهۆیەشەوە خەون و ئاواتەکانی دەستەڵاتدارانی تورکیا بۆ هەرەسپێهێنانی بزاڤی رزگاریخوازی گەلی کوردستان ناکام و پوچەڵ بونەتەوە، ئێستا رۆڵ و کاریگەری رێزدار ئۆجەلان لەسەر پڕۆسەی ئاشتی بۆ گێڕانەوەی هێمنایەتی و برایەتی لە رۆژهەڵاتی ناڤین بۆ هەمووان خۆیا بووە، بۆیە درەنگ یا زوو دەستەڵاتدارانی تورکیا ناچار دەبن کە رێبەر ئۆجەلان ئازاد بکەن؛ لەو سۆنگەیەوە لە ساڵڕۆژی رفاندنی رێزدار ئۆجەلاندا، ئێمە لە حزبی رزگاریی کوردستاندا داوا لە کۆمەڵی نێودەوڵەتی و رێکخراوەکانی مافی مرۆڤ و تێکڕای ئازادیخوازانی جیهان دەکەین کە گوشارەکانیان بۆ ئازادکردنی رێزدار ئۆجەلان لەسەر دەوڵەتی تورکیا چڕتر بکەنەوە، چونکە بە ئازادکردنی رێبەر ئاپۆ و سەڵماندنی مافەکانی گەلی کوردستان لەلایەن تورکیاوە نەک هەر شەڕی نێوان کورد و تورک کۆتا دەبێ، بەڵکو ئاشتی و ئارامی بۆ ناوچەکە دەگەڕێتەوە. بۆ ئەو مەبەستەش دەخوازین کە هەرچی زووترە رێزدار ئۆجەلان ئازاد بکرێ.

سڵاو بۆ رێزدار ئۆجەلان.

روورەشی بۆ پیلانگێڕ و داگیرکاران.

 

مەکتەبی سیاسی

حزبی رزگاریی کوردستان

١٥-٢-٢٠١٥