هەموومان پێشمەرگەین

بەیاننامەی هاوبەشی پارت و لایەنە سیاسییەكان لە ( 24 )ە مین ساڵیادی ئازادكردنی شاری هەولێر لە 11/3/1991

جەماوەری خۆشەویستی كوردستان

خەڵكی بەئەمەك و دڵسۆزی شاری هەولێر

كەس و كاری شەهیدە نەمرەكان

 24 ساڵ لەمەوبەر لەدرێژەی هەڵمەتەكانی رۆژانی راپەڕین و رزگاركردنی شارو شارۆچكەكانی كوردستان , لەرووداوێكی مێژوویی و گرنگ لەرۆژی 11/3/1991 بەپشتیوانی خودای گەورەو هێزوو بازووی پێشمەرگەی كوردستان هاوكات لەگەڵ خەڵكی سەربەرزی شاری هەولێر بەكوردو توركمان و گەلی ( كلدانی سریانی  ئاشووری ) و هەموو چین و توێژەكانیەوە , بەرامبەر بەرژێمی حزبی بەعسی دیكتاتۆر هاتنە دەنگ بەیەك رەنگ و یەك دەست و بەئیرادەیەكی بەهێز گوتیان نا بۆ چەوسانەوەو ژێر دەستی , بەڵێ‌ بۆ ئازادی و چەسپاندنی حوكمی گەل .

جێگەی دڵخۆشی بوو لەماوەیەكی كورتدا تەواوی دام و دەزگا داپڵۆسێنەرەكانی رژێمی بەعس رزگار كران .

دوژمنان و داگیركەرانی كوردستان هیچ رێگایەكی نامرۆڤانە و دوور لەبەها ئاینی و سیاسی و كۆمەڵایەتی نەما كە بۆ كپكردنی دەنگ و ئیرادەی خەڵكی كوردستان نەی گرنەبەر , رۆژبەرۆژ پرۆژەو پیلانی تازەیان دادەڕشت لەشێوەی راگواستن و ئەنفال و جینۆسایدكردن تابەو هۆیەوە گەلی كوردستان لەناو بەرن، بەڵام یەكڕیزی خەڵكی كوردستان و لایەنە سیاسیەكان و گیان لەخۆ بردویی هێزی پێشمەرگەی كوردستان و ئیرادەی لەبن نەهاتووی جەماوەری كوردستان سات لەدوای سات بۆ بەرگریكردن لەخاك و نیشتمان بەهێزترو بەگوڕتر دەبوو .

جێگەی ئاماژە پێكردنە ئەو سەركەوتنە مەزنەی خەڵكی راپەڕیوی شاری هەولێر هاوكات بوو لەگەڵ یادی رێكەوتننامەی ( 11 ) ی ئازار ی ساڵی 1970 كە حكومەتی ئەوسای عێراق دانینا بەمافی رەوای خەڵكی كوردستان .

ئێمە لێرەدا كە یادی سەركەوتنەكانی راپەڕین و رزگاری كوردستان بەكەركوكی خۆشەویستەوە دەكەینەوە , پڕبەدڵ پیرۆزبایی لەخەڵكی بەئەمەكی كوردستان بەگشتی و شاری قەڵاو منارە بەتایبەتی دەكەین و سەری رێزو نەوازش بۆ گیانی پاكی شەهیدان دادەنوێنین و سڵاوی خۆڕاگری بۆ هێزی پێشمەرگە دەنێرین .

ئەمڕۆ لەكاتێكدا یادی ئەم راپەڕینەوە مەزنە دەكەینەوە وەك حزب و لایەنە سیاسیەكانی كوردستان و پارێزگای هەولێر دەرهەق بەم باروودۆخە تازەی كوردستان و ناوچەكە بەپێویستی دەزانین هەڵوێستمان لەم چەند خاڵەی خوارەوە بخەینەروو .

١-رووبەروو بوونەوەی تیرۆرستانی داعش و ئەو باروودۆخە نەخوازراوەی هەرێمی كوردستان و ناوچەكەی گرتووەتەوە پێویستی بە یەكڕیزی و یەك هەڵوێستی لایەنە سیاسیەكان هەیە .

٢- پشتیوانی بۆ هێزی پێشمەرگەی كوردستان دووپات دەكەینەوە .

٣- داوا دەكەین ژیان و بژێوی خانەوادەی سەربەرزی شەهیدان و پێشمەرگەكان و قوربانیانی دەستی تیرۆر و دوژمنانی كوردستان باشتر بكرێت .

٤-بەدامەزراوەیی كردنی هێزی پێشمەرگەی كوردستان و چاكسازی لەدام و دەزگاكانی حكومەتدا بەپێویست دەزانین بۆ پتەتروكردنی نێو ماڵی كوردستان .

٥-   داوا لەحكومەتی ناوەند دەكەین بودجە بۆ هەرێمی كوردستان و مستحقاتی هێزی پێشمەرگەی كوردستان رەوانە بكات و رێككەوتنەكان بخرێنە بواری جێبەجێكردنەوە .

٦-  سوپاس و پێزاین بۆ ئەو كەسە نیشتمان پەروەرانەی كە هاوكاری و كۆمەكیان بەخشی بەهێزی پێشمەرگەو خوشك و برا ئاوارەكان .

٧-رۆڵی وڵاتانی هاوپەیمان بەرز دەنرخێنین بۆ پشتیوانی كردنی گەلی كوردستان .

٨-  سوپاس و دەستخۆشی بۆ هێزەكانی ناوەخۆ لەسەرتاسەری كوردستان تایبەت شاری هەولێر كە لەم قۆناغەدا رۆڵی گرنگیان بینیوە .

 

لەكۆتاییدا جەخت دەكەینەوە لەسەر یەكڕیزی و تەبایی هەماهەنگی زیاتر .

سڵاو بۆ خۆڕاگری پێشمەرگەی كوردستان

سڵاوبۆ گیانی پاكی شەهیدانی كوردستان تایبەت شەهیدانی دەستی تیرۆرستانی داعش و شەهیدانی رزگاری شاری هەولێری خۆشەویست .

 

ناوی حزب و لایەنە سیاسیەكانی بەشداربووانی ئەم كۆبوونەوە :-

١-    یەكگرتووی ئیسلامی كوردستان/ مەڵبەندی دوو

 ٢-   پارتی گەلی توركمان

٣-    كۆمەڵەی لیبرالی توركمان

٤-    پارتی دیموكراتی توركمانی كوردستان

٥-    كۆمەڵی ئیسلامی كوردستان/ مەڵبەندی سێ‌

٦-حزبی ئایندەی كوردستان /لقی هەولێر

٧-   حزبی سۆسیالیستی دیموكراتی كوردستان / مەڵبەندی هەولێر

٨-   یەكێتی نەتەوەیی دیموكراتی كوردستان / هەرێمی هەولێر

٩-    بزووتنەوەی توركمانی بێلایەن

١٠-      حزبی یموكراتی بیت نەهرێن / لقی هەولێر

١١- حزبی زەحەتكێشانی كوردستان / كۆمیتەی سەركردایەتی هەولێر

١٢-بەرەی توركمانی عێراقی / لقی هەولێر

١٣-حزبی رزگاری كوردستان/ كۆمیتەی پارێزگای هەولێر

١٤- بزوتنەوەی گۆڕان . مەكۆی هەولێر

١٥- پارتی چاكسازی پێشكەوتووی توركمان .

١٦-   بزووتنەوەی دیموكراتی گەلی كوردستان / ناوەندی هەولێر

١٧-   پارتی یەكگرتووی توركمان لقی هەولێر

١٨-  پارتی كرێكاران و رەنجدەرانی كوردستان/ ناوەندی هەولێر

١٩-ئۆجاغی برایەتی توركمان / قارداش لق

٢٠-  بزووتنەوەی ئیسلامی لەكوردستان /مەڵبەندی سێ‌

٢١-پارتی رزگاری نەتەوەیی توركمان

٢٢-   حزبی شیوعی كوردستان / كۆمیتەی پارێزگای هەولێر

٢٣-   یەكێتی نیشتمانی كوردستان / مەڵبەندی سێ‌

٢٤- پارتی دیموكراتی كوردستان/ لقی دوو

٢٥-   كۆمەڵەی رۆشنبیری توركمان

٢٦-  ئەنجوومەنی نەتەوەی كلدان

٢٧ كۆمەڵەی رۆشنبیری كلدان

٢٨- حزبی توركمان ئیلی

٢٩-   پارتی نیشتمانی توركمان

٣٠- پارتی گەشەپێدانی توركمان

٣١- پارتی كۆماری كوردستان