یەكی ئایار،رۆژی هاوپشتی كرێكار و رەنجدەرانی جیهان پیرۆز بێ

کرێکاران، زەحمەتکێشان!

رەنجدەران و بەشمەینەتانی کوردستان!

راستیەکی حاشا هەڵنەگرە کە كرێكاران و رەنجدەرانی جیهان بە تێكۆشانی نەپسانەوەی خۆیان، بە ئاچڕەی ماندووبوونیان، بە رەنج و قوربانیدانی بەردەوامیان، رۆژی یەكی ئایاریان كردە رۆژی هاوپشتی چینی کرێکاران و زەحمەتکێشان، هەربەوهۆیەشەوە ئەمڕۆ لە سەرانسەری جیھاندا بە شكۆوە رێز لە خەبات و تێکۆشانیان دەگیرێ و یادی گیانبەختکردووانی کاروانەکەیان دەكرێتەوە، ئێمەش لە حیزبی رزگاریی کوردستاندا کە بۆ سەربەخۆیی نیشتمانی و گەیشتن بە یەکسانی و وەکهەڤی درێژە بە تێکۆشان دەدەین، رۆژی جیهانی هاوپشتی چینی کرێکارو رەنجدەران پیرۆز دەکەین و سڵاو لە تێکۆشەرانی بیروبازو دەکەین.

یەکی ئایار، رۆژی درەوشاوەی ئاسمانی تێکۆشانی كرێكاران و رەنجدەرانی جیهانە، خەبات و قوربانیدانی چەوساوانی کوردستانیش ئەستێرەیەکی داگیرساوەو ئاسمانەکەی رووناک کردۆتەوە، بەوهۆیەوە هاوهەنگی و پێوەندیێکی بەتین و لەپساننەهاتوو بەرجەستەبووە، چەوساوانی کوردستان سەرباری خەباتکردنیان بۆ وەدەستهێنانی مافەکانیان و گەیشتن بە یەکسانی و وەکهەڤی، بەدرێژایی سەد ساڵی رابردوو لێبڕاوانە بۆ رزگاری نەتەوەیی و سەربەخۆیی نیشتمانی تێکۆشاون، شانازی و سەربەرزیان تۆمار کردووە.

یەکی ئایار رۆژی هەڵسانەوە و ڕابوونەوەی چەوساوانە، بە هەوڵ و تێکۆشانی خوێناوی، بە ھێزی ھزری مرۆڤدۆستانەوە وەبەرهەم هاتووە، خەباتی کرێکار و رەنجدەران بۆ سڕینەوەو بنبڕکردنی چەوسانەوە درێژەی هەیە، هەربۆیە رژێمە دیکتاتۆر، زۆردار و خۆسەپێنەرەكان هەترەشیان لە خرۆشانی یەکی ئایار چووە، هەوڵی قەدەغەكردنیان داوە، كۆسپ و تەگەرەیان لە بەردەم کاروانی خەباتی چەوساوان دروست کردووە، بەڵام خۆشبەختانە تێكۆشان و بەرخۆدان دژ بە دیکتاتۆرو چەوسێنەرو زۆرداران بەردەوامی هەیە. وێڕای ئەوانەشەوە جێی داخباریە کە ئەمجارەشیان یەکی ئایار لە کاتێکدا دێتەوە کە هێشتا ملیۆنان مرۆڤ لە چێژی ژیان بێبەشکراون، سک هەڵدەگوشن و بەبرسێتی سەردەنێنتەوە، هێشتا بە ملیۆنان مرۆڤ خەون بە بژێوی رۆژانەوە دەبینن و لەبێدایدا دەتلێنەوە، هێشتا بێکاری مۆتەکەیەو زۆرینەی جیهانی داپۆشیوە.

یەکی ئایار لە کاتێکدا دێتەوە کە جەماوەری ستەمدیدەی کوردستان رووبەڕووی رەوشێکی ئابووری سەخت و دژوار بوونەتەوە، هەژاری و نەبوونی بەربینگی لە بنەماڵە کەمدەرامەت و بێکارەکان گرتووە، وێڕای ئەوانەشەوە هەرەشەو پەلامارەکانی چەتەکانی داعش بۆ سەر کوردستان مەترسی لەسەر تێکڕای خەڵک دروست کردووە، ئەو رەوشەش وا دەخوازێ کە خەبات و تێکۆشانی کرێکارو رەنجدەرو ستەمدیدەو چەوساوان جۆش وخرۆشێكی نوێ پێبدرێ، بەیەکڕێزی پارێزگاری لە کوردستان بکرێ و بەرەو رووخاندنی کۆشکی ستەم و زۆرداری هەنگاو هەڵبگرێتەوە، یەکسانی و وەکهەڤی بەدیاری بهێنێ. هەروەها کاتی ئەوەیە کە كرێكار و رەنجدەران و چەوساوانی گەلەكەمان، هەمووان بە یەك ئاراستە و بەیەک دروشم و بۆ یەک ئامانج بڕژێنە سەرشەقامەکان، هەم نەفرەت لە تیرۆریستان و داعشی بیرتاریک بکەن، هەمیش راشکاوانە ئاوازی ئازادی، یەكسانی و ئاشتەوایی بە دەنگی بەرز بڵێنەوە، بەیەک دەنگ، هەموو ئەوانە ریسوا بکەن کە قوتی خەڵک هەڵدەڵوشن و جەماوەر لە برسێتی و چاوەڕوانی رادەگرن.

پیرۆز بێ یەکی ئایار، رۆژی هاوپشتی كرێكار و رەنجدەران.

شەکاوەبێ خەبات لەپێناو یەکسانی و وەکهەڤی.

ریسوایی و شەرمەزاری بۆ زۆردارو چەوسێنەران.

مەکتەبی سیاسی

حیزبی رزگاریی کوردستان

١-٥-٢٠١٥